Егор Тарнавский башкарма комитет җитәкчесе итеп билгеләнде

22 майда Яңа Чишмә муниципаль район Советының чираттагы 56 нчы утырышы булды, анда район башкарма комитеты җитәкчесен билгеләү мәсьәләсе каралды. Утырышны район башлыгы урынбасары Надежда Попкова алып барды.

Район башкарма комитеты җитәкчесе кандидатурасы буенча тавыш бирү алдыннан конкурс нигезендә сайлап алу процедурасы үткәрелде, регламент шуны таләп итә. Вазыйфага ике кеше дәгъва итте: Егор Тарнавский һәм ТР Казначылык департаментының Яңа Чишмә районы буенча территориаль бүлеге җитәкчесе Константин Семеняк.

Егор Тарнавский кандидатурасы район Советының барлык депутатлары тарафыннан бертавыштан хупланды. Моңа кадәр ул район башкарма комитеты җитәкчесе вазыйфаларын башкаручы булып эшләде.

Район Советы утырышында Татарстан Рәисе Администрациясе җитәкчесенең беренче урынбасары, территорияләр белән эшләү идарәсе җитәкчесе Илнур Гарипов катнашты. Ул шулай ук Егор Тарнавскийны хуплавын белдерде.

Үз чыгышында ул эшнең төп юнәлешләрен билгеләде: районның барлык инфраструктурасын комплекслы үстерү, икътисади күрсәткечләрне саклау һәм арттыру, социаль мәсьәләләрне хәл итү, районга инвесторлар җәлеп итү, авыл хуҗалыгы җитештерүен алга таба үстерү, терлекчелеккә аерым игътибар бирү, СВОда катнашучыларга һәм аларның гаиләләренә ярдәм күрсәтү һ. б.

«Яңа Чишмә районының перспективалары һәм мөмкинлекләре зур. Районыбыз халкы белән бергә республика җитәкчелеге ярдәмендә без барлык планнарны тормышка ашыра алачакбыз һәм Яңа Чишмә районын уңайлы һәм тормыш сыйфаты югары булган тагын да матуррак җир итә алачакбыз», — дип билгеләде Егор Тарнавский.

Район Советы утырышында шулай ук коррупциянең торышы һәм аны киметү буенча гамәлгә ашырыла торган чаралар турында мәгълүмат тыңланды, аның белән район башлыгы ярдәмчесе Ирина Лобачева чыгыш ясады, җәйге чорда балаларның ялын һәм мәшгульлеген оештыру турында Яшьләр эшләре һәм спорт бүлеге начальнигы Анастасия Бочарова сөйләде. ТР дәүләт телләрен һәм башка телләрне саклау, өйрәнү һәм үстерү программасының гамәлгә ашырылуы турында мәгариф бүлеге начальнигы Анна Бутина таныштырды.