Янгын куркынычсызлыгы сагында

Салкыннар килү белән электр җиһазларын урнаштыру һәм эксплуатацияләү, мич җылыту кагыйдәләрен бозу аркасында килеп чыккан янгыннар саны сизелерлек арта.

«Торак – 2025» профилактик операциясе кысаларында «Бөтенроссия ирекле янгын сүндерү җәмгыяте» беренчел бүлекчәсе рәисе Айдар Мифтахов 124 нче янгын сүндерү-коткару часте башлыгы Айдар Канафин белән берлектә район үзәгендә һәм районның башка торак пунктларында рейдлар үткәрделәр.

«Янгыннарның һәм үлем очракларының күп өлеше нәкъ менә торак биналарда, бигрәк тә шәхси секторда була. Кызганычка каршы, мондый хәлләр еш кына фаҗига белән тәмамлана, кешеләр үлеменә китерә, - ди Айдар Мифтахов.

Янгын чыгуның төп сәбәпләре үзгәрешсез кала бирә:

- электр җылыту приборларын кулланганда янгын куркынычсызлыгы кагыйдәләрен бозу;

- электрүткәргечнең төзексезлеге;

- мичләрне эксплуатацияләү кагыйдәләрен үтәмәү;

- ут белән саксыз эш итү.

Моннан тыш, салкынайган саен челтәргә тоташтырылган җылыткычлар саны арту белән электр челтәрендәге йөкләнеш арта. Кайбер очракларда, бигрәк тә үткәргечләр табигый искергәндә яки югары йөкләнештә озак эшләгәндә, кыска ялганышлар була, алар януга китерергә мөмкин.

Нәкъ менә шундый хокук бозу Красный Октябрьдәге шәхси йортларның берсендә ачыкланган, анда йортта «буржуйка» дип аталган мич тора, әгәр аны караусыз калдырсаң, янгын куркынычы иң зурлардан санала. Йорт хуҗабикәсе белән аңлату эшләре үткәрелгән.

Гади саклык чаралары фаҗига булдырмаска ярдәм итәчәк. Шуны истә тотарга кирәк: утка һәм электр приборларына җиңел карарга ярамый. Көнкүрештә без ут белән даими очрашабыз: күпләр газ плитәләре куллана. Ут үзеннән-үзе кабынмый. Электр приборларын розеткалардан сүндерергә, өйдән чыгып китәр алдыннан утны һәм озынайткычларны сүндерергә кирәк.

Һәр гаилә янгыннарны булдырмау буенча тәкъдимнәр язылган белешмәләр алды. Даими профилактикалау һәркемгә кирәк, чөнки бер мизгелдән соң нәрсә булачагын беркем дә белми. Нәтиҗәләрне кисәтү - безнең барыбыз өчен дә мөһим бурыч».