Язгы ташу мул сулы булырга охшаган

Узган кыш кар күп яуганлыктан, быел яз мул сулы булырга вәгъдә итә һәм районның кайбер торак пунктларында су басу куркынычы бар.

Яңа Чишмә районының су объектларында язгы ташу мартның соңгы декадасы – апрель башында башланыр дип фаразлана.

Район башкарма комитеты җитәкчесе Ринат Фәсахов халыкның иминлеген, биналар, күперләр, юллар, гидротехник корылмаларның сакланышын тәэмин итү өчен тиешле карар кабул ителүен һәм гадәттән тыш хәлләр министрлыгы утырышында «Язгы ташу» планы кабул ителүен хәбәр итте.

План нигезендә язгы ташу буенча чаралар әзерләнгән. 2025 елның көзендә барлык 19 ГТСта су куркынычсыз дәрәҗәгә кадәр төшерелгән.  Юллардагы су торбаларының башлары чистартылачак. Район буенча алар 405, шулардан 215енә – юл төзүчеләр, ә 190ына – авыл җирлекләре хезмәт күрсәтә. Су басу куркынычын киметү өчен район үзәге урамнарыннан кар чыгарылган.

Шулай ук Шушма һәм Кичү елгаларында бозны каралту эшләре дә планлаштырылган. Гидрологик хәлне күзәтү өчен ике стационар гидропост, Яңа Чишмә һәм Архангел Бистәсендә ике вакытлы пост, шулай ук авыл җирлекләрендә күзәтү постлары булдырылган, алар су биеклегенең күтәрелүен күзәтәләр.

Районда Шушма елгасында (Яңа Чишмә һәм Архангел Бистәсендә) боз тоткарлану куркынычы булган ике участок бар.  Республиканың махсус хезмәтләренә кирәк булган очракта шартлату эшләрен башкаруга гариза бирелгән.

Агымдагы елда Яңа Чишмә районы буенча Яңа Чишмә, Петропавел, Ленино, Әдәмсә, Архангел, Екатерина, Акъяр, Черемухово, Красный Октябрь авыл җирлекләре территорияләрендә су басу куркынычы бар. Бу җирлекләрдә куркыныч зонада 116 йорт урнашкан, аларда 265 кеше, шул исәптән 46 бала яши.  Архангел Бистәсендә су басу ихтималы булган зонага шулай ук 46 метр озынлыктагы тәбәнәк сулы күпер дә эләгә.

Социаль әһәмиятле объектлар, икътисад объектлары, автомобиль юллары участоклары, биотермик чокырлар һәм себер язвасы каберлекләре су басу зонасына эләкми.

Районда язгы ташу буенча комиссия төзелде, төп чаралар исемлеге расланды.  5 төяү насосы, 26 мотопомпа, су суырту өчен махсус техника һәм энергия белән тәэмин итүнең 80 резерв чыганагы бар.

Һәр авыл җирлегендә эш планы эшләнгән, вәзгыятьне контрольдә тоту һәм кирәк булганда кичектергесез чаралар күрү буенча җаваплы кешеләр билгеләнгән.

Авыл җирлеге башлыкларына һәм оешма җитәкчеләренә (бигрәк тә югарыда күрсәтелгән авыл җирлекләрендә) халыкны, терлекләр һәм матди байлыкларны эвакуацияләгән очракта вакытлыча урнаштыру пунктлары, көймәләр һәм башка коткару чараларын әзерләү турында кайгыртырга кирәк.

Ташу чорында газ, энергия, су белән тәэмин итүнең, күпер корылмаларының тиешенчә эшләвен тәэмин итү бик мөһим.

Су басу мөмкин булган урыннарда яшәүче халыкка алдан әзерләнү зарур.

Ашыгыч очракларда түбәндәге телефоннар аша мөрәҗәгать итәргә кирәк:

1. 2-21-54, 01, 112, 101 (мобиль телефоннан).

2. Эчке эшләр министрлыгы - 02, 2-26-73, 102 (мобиль телефоннан).

3. Ашыгыч ярдәм - 03, 103 (мобиль телефоннан).

4. Райгаз - 04, 104 (мобиль телефоннан).

5. Район башкарма комитеты – 2-20-07, 2-20-09

6. Яңа Чишмә авыл җирлеге башкарма комитеты - 2-22-79