Мәхәббәт, яраткан хезмәт һәм ныклы гаилә – бәхет нигезе

Анда юбиляр гаиләләрне котладылар, бала тууга сертификатлар һәм яшь яңачишмәлеләргә Россия паспортлары тапшырдылар.

Ике гаиләнең быел алтын туйлары. 15 августта Петропавел Бистәсеннән Анна һәм Виктор Ерохиннар уртак гомерләренең 50 еллыгын билгеләп үтте. Виктор тумышы белән шушы авылдан, Анна – Елховодан. 1974 елда егет шул авыл яныннан узганда бакчада бер матур кызны күрә һәм гашыйк була. Бер елдан алар өйләнешәләр. Виктор 34 ел колхозда эшли, ә Анна 20 елдан артык хат ташучы була. Алар бергәләп нык гаилә корганнар, бер ул һәм бер кыз үстергәннәр, хәзер биш оныкларына куанып яшиләр.

Икенче алтын пар тарихы Чаллы Башы авылында башлана. Фәргать белән Нәкыя Хәбибуллиннар юбилейларын 25 октябрьдә билгеләп үтәчәкләр. Яшь чакта язмыш аларны вакытлыча аерып тора: егет армиягә, кыз шәһәргә китә. Ләкин икесе дә туган авылларына әйләнеп кайталар һәм шунда бер-берсе өчен яратылганлыкларын аңлыйлар.

Туйдан соң  беразга гына Чистайда яшәп алалар, ләкин бөтен йөрәкләре белән туган якларына тартылалар һәм көннәрдән бер көнне Чаллы Башына мәңгегә кайталар.

Нәкыя чирек гасыр сыер савучы булып, аннары балалар бакчасында эшли. Фәргать тракторчыдан колхоз председателенә, аннан соң сөт заводы директорына кадәр юл үтә. Аларның төп байлыгы – гаилә: ике бала һәм дүрт онык.

Бәйрәм кунаклары бергә яшәүнең 45 еллыгын билгеләп үтүче сапфир юбилярлар турында берьюлы өч вакыйга ишеттеләр. Әдәмсә авылында Тәһият белән Минсәрия Галимовлар яши. Алар егет армиядән кайткач дуслашалар. Туйдан соң аларның хезмәт һәм үзара ярдәмләшү белән тулы уртак тормышы башлана.

Тәһият күп һөнәрләр үзләштерә: тракторчы һәм бригадирдан алып инженерга кадәр хезмәт юлы үтә, пенсиягә чыкканчы 17 ел нефть тармагында эшли. Минсәрия шулай ук клубта сәнгать җитәкчесе һәм сыер савучыдан алып Саклык банкында кассирга кадәр төрле вазыйфаларда эшли.

Төп байлыклары – дүрт бала, алар әти-әниләренә сигез онык бүләк итә.

Рафаэль белән Мәдинә Нәбиуллиннарның мәхәббәт тарихы 1978 елда Бакташ авылында башлана. Алар ике ел аралашып йөргәннән соң өйләнешәләр.

Тырыш тракторчы Рафаэль авылдашларының хөрмәтен яулый һәм 1980-1985 елларда Татарстан АССР Югары Советы депутаты була. Башта сатучы, аннары сыер савучы һәм бозау караучы Мәдинә дә үзенең намуслы хезмәте белән колхоз үсешенә өлеш кертә. Рафаэль белән Мәдинә 42 һәм 38 ел хезмәт стажы белән пенсиягә чыгалар.

Аларның ике кызы югары белем ала, үз гаиләләрен кора. Түбән Камада яшиләр, әмма әти-әниләре янына бик еш кайтып йөриләр.

Яңа Чишмә авылында яшәүче Анна һәм Андрей Исаевлар 45 ел бергә яшиләр. Алар сөт заводында эшләгәндә танышканнар.

Андрей 37 елдан артык машина йөртүче булып эшли. Анна бухгалтер була, аннары 18 ел Пенсия фондында, 7 ел Үзәк район хастаханәсендә эшли.

Алар ике бала үстерәләр: уллары Әлмәттә, ә кызлары, әти-әниләре кебек үк, туган җирендә эшли. Исаевларның алты оныклары бар.

Олы яшьтә булуларына карамастан, Исаевлар актив тормыш рәвеше алып баралар, бакчада эшлиләр һәм оныкларын үстерергә булышалар.

Әлеге гаиләләрнең тормышы – мәхәббәт һәм хезмәт сөючәнлекнең чын елъязмасы, ул бәхетнең нык гаилә, яраткан эш һәм якыннарың турында кайгыртуда икәнен искә төшерә.

Ныклы озын никахларының сере - үзара аңлашу, хөрмәт итү, кичерә һәм сөенә белү.

Бәйрәмдә тантаналы рәвештә яшь гаиләләргә акчалата сертификатлар да тапшырылды. Красный Октябрьдән Любовь һәм Евгений Захаровлар - беренче бала өчен, ә Тубылгытаудан Гөлдания һәм Раил Фәгыйзовлар өченче балалары өчен сертификат алдылар. Моннан тыш, Фәгыйзовларга күпбалалы гаилә таныклыгы бирелде.

Барлык гаиләләрне район җитәкчесе Егор Тарнавский һәм аның урынбасары Надежда Попкова котладылар, аларга Рәхмәт хатлары, сертификатлар, чәчәкләр һәм бүләкләр тапшырдылар.  

Бәйрәмдә 10 яшүсмер тантаналы рәвештә Россия паспорты алдылар. Төп документны аларга Егор Тарнавский һәм СВОда катнашучы Сергей Коньков тапшырды. Сергей кыска вакытлы ялда һәм бәйрәмгә хатыны Ирина белән килгән. Яшь гаилә никахларын әле сентябрь уртасында гына теркәгәннәр.

Паспорт алган балаларга шулай ук «Бердәм Россия»нең җирле бүлекчәсеннән һәм Беренчеләр хәрәкәтеннән зур булмаган бүләкләр бирелде.

Бәйрәмне район һәм авыл мәдәният йортлары артистлары һәм Балалар сәнгать мәктәбендә тәрбияләнүчеләр башкаруында музыкаль номерлар бизәде. Чара азагында барлык катнашучылар бергә истәлеккә фотога төштеләр.