Февральдә социаль фонд медицина хезмәткәрләренә махсус социаль түләү бирә башлаячак

Хөкүмәт карары белән кертелгән яңа түләү 2023 елның гыйнварыннан сәламәтлек саклау, район үзәк, район һәм участок хастаханәләренең беренчел звеносы медицина хезмәткәрләренә, шулай ук ашыгыч ярдәм бүлекләрендә һәм станцияләрдә эшләүчеләргә каралган. Түләү күләме медицина хезмәткәрләре категориясенә һәм медицина оешмасы төренә карап 4,5 меңнән 18,5 мең сумга кадәр тәшкил итәчәк.

Түләүнең операторы итеп Россиянең Социаль фонды билгеләнгән, шул ук вакытта акчалар медицина оешмалары мәгълүматларына нигезләнеп биреләчәк. Һәр ай нәтиҗәләре буенча алар ярдәм алырга хокуклы хезмәткәрләрнең электрон реестрын формалаштырырга һәм бу мәгълүматны Социаль фондка тапшырырга тиеш. Реестрда хезмәткәр турында белешмәләр белән беррәттән өстәмә түләүнең күләме һәм түләүнең кайсы мәгълүматларга таянып исәпләнгәне да күрсәтелә.

 «Медицина хезмәткәрләренә яңа түләү алу өчен бернәрсә дә эшләргә кирәкми - акча автомат рәвештә биреләчәк. Социаль фондның территориаль бүлекчәләре түләүне медицина оешмалары хезмәткәрләр реестрын формалаштырганнан һәм фондка тапшырганнан соң 7 эш көне дәвамында күчерәчәкләр», - дип тәгаенләде клиентлар хезмәте җитәкчесе Лилия Хираҗева. Гыйнвар ае өчен түләүләр табибларга февраль азагында ук күчәчәк. Акчалар Социаль фондка медицина оешмасы тәкъдим иткән реквизитлар счетына күчереләчәк.

Медицина хезмәткәрләренә яңа махсус социаль түләү Социаль фондка бюджетара трансфертлар буларак тапшырыла торган Федераль мәҗбүри медицина иминияте фонды акчаларыннан финанслана.