40 ел элек без ниләр турында язган идек

«Яңа Чишмә хәбәрләре» 1984 ел, 4 декабрь 

 Районның партия-хуҗалык активы җыелышында «Хокук тәртибен саклау эшен яхшырту һәм хокук бозуларга каршы көрәшне көчәйтү» мәсьәләсе каралды. Доклад белән КПСС райкомының беренче секретаре Гариф Хафизов чыгыш ясады. Фикер алышуларда Калинин исемендәге колхоз рәисе Михаил Борисов, РЭЭБ начальнигы урынбасары Виктор Кузнецов, ВЛКСМ райкомының беренче секретаре Азат Мусин, Ленино авыл Советы башкарма комитеты рәисе Владимир Леонтьев һәм башкалар чыгыш ясады.

Сөт саву буенча оператив сводкада XX партсъезд исемендәге колхоз беренче урында, биредә 5 көн эчендә һәр сыердан 38,8 кг сөт савылган (ягъни көнгә 8 кг чамасы). «Кичуй» колхозы, «Закамский» һәм «Буревестник» совхозлары калыша, монда тәүлеклек савым 3-3, 5 килограммнан артмый.

«Яңа Чишмә хәбәрләре» 1984 ел, 6 декабрь 

Яңа Чишмәдән сугыш ветераны Анатолий Иванов 1944 елның язындагы канкойгыч сугышларның берсе турында яза. Безнең сугышчылар фашистларның чираттагы атакасын кире кактылар һәм яралы немецны әсирлеккә алдылар. Сорау алганнан соң аны безнең лазаретка озаттылар, ләкин немецлар минометтан ут ачтылар һәм әсирне озата баручы белән бергә икесе дә һәлак булды. «Бу минем хәтердә тирән эз калдырды», - дип яза автор. 

Калинин исемендәге колхозның дуңгыз фермасы мөдире Анна Барсукова терлекләрне кышлату турында яза. Дуңгызларны яхшы карау һәм тиешенчә ашату нәтиҗәсендә симертүдә - 350-400 грамм, ә Елена Барсуковада - 450 граммга кадәр арту күзәтелә, дип яза ул.

«Яңа Чишмә хәбәрләре» 1984 ел, 8 декабрь 

СССР Югары Советы Президиумы Указы белән «Хезмәт ветераны» медале белән бүләкләнгән район колхоз һәм совхоз хезмәтчәннәренең исемлеге басылып чыкты. Исемлектә 40 кешенең фамилиясе бар.

Халык контроленең район комитеты рейды барышында Куйбышев исемендәге колхозда терлекләрне кышлатуны оештыруда җитди кимчелекләр ачыкланган. Печән һәм витаминлы үлән оны җитәрлек әзерләнмәгән, бина тулысынча ремонтланмаган, терлекләрнең күпләп үлүе күзәтелә һ.б. Колхоз җитәкчелегенә һәм белгечләренә шелтәләр белдерелгән, алар җитешсезлекләрне бетерү чараларын күрергә тиешләр.

КМС лабораториясендә Е.М. Чулкова намуслы эшли, ул югары класслы белгеч.

Рәсемдә: Е. М. Чулкова