Ана капиталы сертификатлары тапшырылды

Бу көнне Акъярдан Садретдиновлар, Ленинодан Барсуковлар, Чаллы Башыннан Касыймовлар, Яңа Чишмәдән Бельковлар, Чуаш Чабаксарыннан Никитиннар гаиләсе ана капиталы сертификатына ия булдылар. Яңа туган сабыйлар бар да малай, исемнәре дә матур: Рамир, Матвей, Радель, Глеб, Артем, өчесе ("шәхсән үзе") тантанада да катнашты.

Аннан кала, ЗАГС мөдире Алия Миръякупова Рәсәйнең яңа гражданы тууны тантаналы шартларда теркәп, Чайниковлар гаиләсенә икенче балалары - уллары Дмитрий туу турында таныклык тапшырды. Бәйрәмгә килгән кунаклар: РФ Дәүләт Думасы депутаты Виктор Пешков, район башлыгы урынбасары, районның хатын-кызлар Советы рәисе Надежда Попкова, РПФ бүлеге начальнигы Ольга Попкова, җирле пенсионерлар берлеге рәисе, әби, әни кеше Анастасия Козлова әти-әниләргә һәм аларның балаларына изге теләкләрен теләп, котлау сүзләре җиткерделәр.

Быел 10 айда Яңа Чишмә районында ана (гаилә) капиталына 54 сертификат бирелгән. Дәүләт ярдәме программасы эшли башлаганнан бирле барлыгы 769 сертификат тапшырылган. Әти- әниләрдән бу акчаларны кая тотасыларын сораштыруга алар бертөрле җавап бирделәр: торак сатып алу яки төзүгә.

Бәйрәм бик җылы узды, чыгыш ясаучылар ихлас теләкләрен ирештерсәләр, мәдәният бүлеге артистлары аналарга булган ярату турында җырлар бүләк иттеләр.

Ольга ИВАНОВА