Чорга тиң гомер : Яңа Чишмәдә яшәүче Виктор Ведякин 95 еллыгын билгеләп үтә

30 октябрьдә хезмәт ветераны Виктор Степанович Ведякинга 95 яшь тула. Аның тормышы – хезмәт, ныклык һәм туган җиргә чиксез мәхәббәт белән тулы бер чорның чагылышы ул.

Аның балачагы бер көндә – 1941 елның 22 июнендә тәмамлана. Өченче классны уңышлы тәмамлаган малай иптәшләре белән елгада коенып ятканда: «Малайлар, сугыш!» - дигән сүзләрне ишетә. 12 яшендә үк ул эвакуацияләнгән хәрби заводка чакырылган әтисен алмаштыра. Ә 14 яшендә әтисе аны үзе белән Казанга алып китә, анда Виктор токарьлыкка өйрәнә һәм җиңүгә кадәр фронтка патроннар чыгара.

Сугыштан соң егетне яңа хезмәт тәртибе – Донбассны торгызу көтә. Торез шахтерлар шәһәрендә ул отбойщиктан тау мастерына кадәр юл үтә, үз мәхәббәтен – шулай ук шахтада эшләгән хатыны Людмила Кузьминичнаны таба. 

1955 елда Виктор Степанович «Шахтерская слава» билгесе белән бүләкләнә. Әмма авыр һөнәре аның сәламәтлеген какшата, һәм 1959 елда гаилә уллары һәм ике кызлары белән, шәһәр фатирын калдырып, кече ватанына кайта, монда инде 1965 елда тагын бер уллары туа.

«Ватанның төтене дә татлы» - бу цитата Виктор Степановичның тормыш юлын ни сәбәпле шул тарафка боруына бик яхшы тасвирлый. Сәламәтлеген саф һавада, колхозда эшләгәндә торгызуны яхшырак күрә. Хезмәтеннән аерылмыйча урта белем ала, аннары Тәтеш авыл хуҗалыгы техникумын яхшы билгеләргә тәмамлап, дипломлы агроном була. Озак еллар ул комплекслы бригада бригадиры булып эшли, аның гаделлеген һәм яхшы күңеллелеген якташлары әле дә искә ала.

Виктор Степанович гомер буе иҗатчы булып кала: үзе бүрәнәдән йорт сала, мичләр чыгара, балаларының тишек киез итекләренең олтанын үзе сала, үз куллары белән чаңгылар ясый, улларына велосипедлар һәм мотоцикллар ремонтлый, балаларга барлык фәннәр буенча укуда булыша. Җиде кыллы гитарада уйный белә, аннары улына гармун сатып ала да үзе шул уен коралында уйный. Дусларча шаржлар һәм карикатураларны шәп ясый (колхоз стена газетасы мөхәррире була), китап укырга ярата, Есенин, Маяковский, Пушкин шигырьләрен яттан сөйли;  фотография ясау белән мавыгып, нәселләре өчен кыйммәтле гаилә елъязмасын дистәләгән фотоальбомнарда саклый.

Бүгенге көндә ул зур гаилә башлыгы, 9 онык, 15 оныкчыкның бабасы.

2025 ел – аның өчен үзенчәлекле ел: тыл хезмәтчәне буларак Бөек Җиңүнең 80 еллыгы һәм үзенең 95 яшьлек юбилее. Әмма аның өчен иң кадерле бәйрәмнәр булып тынычлык һәм хезмәт символы булган май көннәре кала.