Язмышка әйләнгән очраклы сайлау

Алсу Нуртдинова беркайчан да шәфкать туташы булырга хыялланмый. Мәктәптә укыганда даруханәдә эшләргә хыялланган, шуңа күрә аның фармацевт буласы килә. Әмма язмыш башкача хәл итә, һәм бүген, 35 ел узгач, ул фармацевтика буенча конкурсны уза алмаган «уңышсыз» көнен рәхмәт белән искә ала. Бер чыгып киткәч өйгә әйләнеп кайтмас өчен ул Чистай медицина училищесына укырга керә. Бу адым аның тормышында хәлиткеч адым була да инде.

Яңа Чишмә үзәк район хастаханәсенә Алсу Хәсән кызы билгеләнү буенча 1991 елның апрелендә килә. Ул вакытта хастаханә әле иске бинада урнашкан була, анда, аның әйтүенчә, «уңайлыклар бик аз иде». Әмма көнкүреш уңайлылыклары җитмәү коллективның гаҗәеп, бердәм булуы белән компенсацияләнә, хастаханә хезмәткәрләре шунда ук яшь белгечне туганнары кебек кабул итәләр.

«Мин хезмәттәшләремне яраттым, — ди Алсу Хәсән кызы. - Алар мине бөтен нечкәлекләргә өйрәттеләр, остазларым булдылар. Алар ярдәмендә мин уйламаган җирдән үзләштергән һөнәремне яраттым».

Медицинада үзенең беренче адымнарын ул поликлиниканың хирургия бүлегендә ясый, өлкәнрәк, тәҗрибәлерәк шәфкать туташларыннан эшкә өйрәнә. Ә 1992 елда мөһим вакыйга була - хастаханә зур тәрәзәле якты кабинетлары булган яңа, иркен бинага күчә. Бу Алсу Хәсән кызының үзе өчен дә яңа тормыш символына әверелә.

2002 елдан аның һөнәри биографиясе балалар поликлиникасы белән тыгыз бәйләнә. Менә инде 24 ел ул балалар табибы янында эшли.

«Мин үземне бу һөнәрдән башка күз алдыма да китерә алмыйм, - ди ул. - Шундый белемле, тәҗрибәле докторлар белән эшләвем өчен язмышыма рәхмәтлемен. Алар белән җиңел, Без - команда».

Ләкин гел җиңел булмый. Авырлыкларны ешрак балалар түгел, ә аларның әти-әниләре тудыруын эйтә Алсу Хәсән кызы.  Бигрәк тә профилактик прививкалар турында сүз чыкканда. «Интернетта теләсә нәрсә укыйлар да баш тарталар. Мондый ата-аналарны без үзебез «тәрбиялибез», - дип елмая ул. - Консультация эчендә без «Әниләр мәктәбе» булдырдык, анда лекцияләр укыйбыз, әңгәмәләр үткәрәбез, яшь әниләрне дөрес режимга, туклануга, баланы  йоклатырга өйрәтәбез. Бу эшебез үз җимешләрен бирә – безгә булган ышаныч арта бара».

Кабул ителүгә килгән сабыйларның әниләре Алсу Хәсән кызын игелекле, игътибарлы һәм йөзеннән елмаю китмәгән кеше буларак беләләр.

 «Безнең докторның кабинетына керү һәрвакыт күңелле, - дип уртаклаша Настя, ике бала әнисе. - Доктор да, Алсу да ачык йөз белән каршы алалар, хәлләрне сорашалар, киңәшләр бирәләр.  Алсу хәтта иң үзсүзле сабыйны да тынычландыра һәм күңеленә ачкыч таба белә».

Алсу Хәсән кызының намуслы хезмәте игътибарсыз калмый. Эшләгән елларында ул бик күп бүләкләргә лаек була: үзәк район хастаханәсенең Мактау грамотасы, Яңа Чишмә районы администрациясе Башлыгының Мактау грамотасы, район Башлыгының Рәхмәт хаты, район Башлыгы гранты, ә иң мөһиме — Татарстан Республикасы Сәламәтлек саклау министрлыгының Рәхмәт хаты һәм Мактау грамотасы. Бу бүләкләрнең бәясе - меңнәрчә савыккан балалар, йөзләрчә тынычлык тапкан әниләр һәм дистәләгән еллар буена көндәлек, кайчак сизелми торган, ләкин шундый кирәкле хезмәт.

Алсу Хәсән кызы Аксубай районының Яңа Ибрай авылында тату гаиләдә алтынчы бала булып үсә. Мөгаен, нәкъ менә шунда, зур гаилә даирәсендә, ул шул гаҗәеп сәләткә - һәркем белән уртак тел табу һәм башкалар өчен җаваплылык тоту сәләтенә өйрәнгәндер.

Бүгенге көндә җаваплылык эшендә генә түгел. Аның ире Мидхәт инде берничә ел җитди авырый, һәм бөтен өй эше аның җилкәсендә ята. Ләкин ул зарланмый. Аның юанычы – мәхәббәт, кайгыртучанлык белән үскән кызлары Гөлнара белән Гүзәл. Гөлнара аңа ике онык бүләк иткән. «Малайлар сәламәт үсә - бу әлегә иң мөһиме», - ди ул аналарча җылылык белән.

Ул үзе дә - сәламәт яшәү рәвеше үрнәге. Алсу Хәсән кызы, юл ерак булуга карамастан, эшкә җәяү генә йөри. «Сәламәтлек өчен дә файдалы, киләчәк көн турында уйларга, планнар төзергә вакыт та бар», — дип аңлата ул.