Язмышы билгеләгән

Киеренке тынлык, кайчакта борчулы да. Монда кызык өчен түгел, укол алырга киләләр бит.

 Ләкин котылгысыз авыртуны бетерә, ә куркуны бер секундлы дулкынлануга әйләндерә белә торган кешеләр бар. Шуларның берсе - медицина стажы дүрт дистә елдан артып киткән Резидә Рәшит кызы Нуретдинова.

Аның һөнәр юлы 1983 елда башлана. Тумышы белән Иске Роман авылыннан, ул да авыл кызларының күбесе кебек үк, шәһәрне буйсындыру турында хыяллана. Өч ел Чистай педучилищесында укый, аннары — ике ел Республика клиник хастаханәсендә эшли. Әмма язмыш аңа яшьләрчә амбицияләргә караганда күпкә зирәгрәк сценарий әзерли.

Резидә Рәшит кызы тормышында гаҗәеп борылыш була. Эшкә билгеләнгәч, ул Яңа Чишмәдә эшләргә теләгән, әмма Казанга юллама алган бер Петропавловка кызын очрата. Ә Резидә Казан турында хыялланган була. «Аллаһ язмаган эш булмый», — ди ул бүген. Кызлар «билетларын алмашалар», ә училище җитәкчелеге каршы килми. Шулай итеп ул РКБ реанимациясендә эшли башлый, Гавазга кияүгә чыга һәм 1988 елда кызы Альбина туа.

Ләкин шәһәр аны нибары ике елга гына кабул итә. Торак мәсьәләсе кабыргасы белән тора, һәм шул вакытта иренең туганы әйтеп куя: фатирлар сала торган һәм аларны белгечләргә беренче чиратта бирә торган урын бар. Һәм бу урын... Яңа Чишмә булып чыга. «Менә шулай мин язмыш билгеләгән җиргә килдем дә инде»», — дип елмая Резидә Рәшит кызы. Башта санэпидстанциядә эшли, 1993 елда икенче декреттан соң (уллары Линар туа) ул үз һөнәренә инде үзәк район хастаханәсенә — гинекология бүлегенә кайта.

1995 елда язмыш аны поликлиниканың процедура кабинетына алып килә. Һәм бу гомерлеккә яраткан урыны булып чыга.

 «Ни өчендер миңа укол ясау бик ошый, - ди Резидә Рәшит кызы. - Мин авырттырганымны аңлыйм, ләкин беләм: бу авырту яхшыга, савыгу өчен». Бер сменада аның куллары аша 50 гә якын кеше үтә. Һәм һәр пациент: аның уколы — бер секундлык дулкынлану гына, авырту юк диярлек, ди. Бу еллар буе шомартылган югары пилотаж. Кан алу, системалар кую - барысы да осталык кына түгел, тимердәй салкын тынычлык та таләп итә.

Үзенең беренче уколын ул әле дә хәтерли:   «Бу Чистайда практика вакытында булды. Карт бабай, корсагында яткан килеш: «Кем укол ясый? Практикантка гына булмасын!», диде. Остазы аны: «Үзем кадыйм, бабай, борчылма», — дип алдады да,  үзе ишарә белән миңа ясарга кушты. Дулкынланудан кулларым калтырады, ләкин барысы да яхшы булды: авыру ой дияргә дә өлгермәде», - дип искә ала Резидә. - «Бу эпизодны еллар узгач миңа иремнең туганы танышкан вакытыбызда искә төшерде. Аның исеме дә Резидә, һәм ул вакытта практикада минем остазым да ул иде. Бу очрак – Раббыбыз язган язмыш турындагы гыйбрәтле хикәянең тагын бер дәлиле»

Еллар уза. Резидә Рәшит кызы алты оныкның әбисе хәзер. Һәм монда чын шәфкать туташы портретына тагын бер штрих өстәлә. Ул курыкмыйча һәм кызганмыйча үз балаларына уколлар ясаса да, оныкларына кадаудан катгый рәвештә баш тарта. «Ни өчен? - дип кайтарып сорый ул. — Куркам. Очрашканда мине яратып кочакламаслар, качарлар дип куркам. Алар өчен энә кадаучы усал карчык тугел, яраткан әби  булып калырга телим».

Шулай да Резидә Рәшит кызы, зур стажга ия булса да, яңа пациент белән очрашканда бөтенесенә дә әзер торуын таный. Куркып калуга һәм кулның кискен хәрәкәтенә, кеше үзе белмәгән көтелмәгән аллергик реакциягә. Ул уяулыгын бер генә секундка да югалтмый, чөнки аның һәр гамәле артында пациентларның тынычлыгы һәм сәламәтлеге тора.

Күпьеллык намуслы хезмәте өчен Резидә Рәшит кызы район хакимиятенең Мактау грамотасына, ТР Сәламәтлек саклау министрлыгының Мактау грамотасына, «Поликлиниканың иң яхшы шәфкать туташы» номинациясендә Яңа Чишмә районы Башлыгы грантына һәм, иң мөһиме, Россия Федерациясе Сәламәтлек саклау министрының Рәхмәт хатына лаек була.

Аның эш көне - ул бик күп «авырту» сораулар һәм шулкадәр үк коткару уколлары. Табиблар дәвалаучы булса, коткаручылар — шәфкать туташлары. Алтын кулларыгыз һәм сизгер йөрәгегез өчен рәхмәт сезгә, Резидә Рәшидовна. Медицина хезмәткәрләре көне белән!