«Мәрхәмәтле Яңа Чишмә» волонтерлык үзәге: яхшылык – йөрәктән башлана

 Аларның эшчәнлеге күпкырлы һәм тормышның иң мөһим өлкәләренә кагыла: өлкәннәргә һәм инвалидларга адреслы ярдәм күрсәтүдән алып масштаблы экологик өмәләргә һәм иҗтимагый әһәмиятле чараларга кадәр. Ә махсус хәрби операция башланганнан бирле иреклеләр «Үзебезнекеләрне ташламыйбыз» бөтенроссия акциясенә актив кушылдылар, бу исә башкаларга риясыз ярдәм итәргә әзер яңачишмәлеләр санын арттырды.

«Бүген безнең хәрәкәттә 300гә якын актив волонтер эшли. Һәр, хәтта иң тыйнак, игелекле гамәл дә тормышны яхшы якка үзгәртергә сәләтле, дип ышанабыз», - ди үзәк җитәкчесе Снежана Маланчева, һәркемнең шәхси инициативасының кыйммәтен ассызыклап.

Районның мәгариф һәм муниципаль учреждениеләре базасындагы волонтерлыкка ярдәм итү үзәкләре һәм берләшмәләре тарафыннан барлыгы 268 кеше җәлеп ителгән. Бу төрле яшьтәге һәм төрле һөнәр ияләренең уртак теләк – яхшылык эшләү теләге белән берләшкән тере бергәлеге.

Зирәклек тулы «көмеш йөрәкләр»

Аерым рәхмәт сүзләренә «көмеш» волонтерлар лаек – 55 яшьтән өлкәнрәк 35 кеше. Бу гаҗәеп хатын-кызлар лаеклы ялда булгач та ял итмичә, ирекле хәрәкәт сафына басалар. Аларның тормыш тәҗрибәсе, күңел җылысы һәм бетмәс-төкәнмәс энергиясе үзәк өчен чын терәк. «Көмеш» волонтерларның мондый актив төркемнәре Яңа Чишмә, Горшково, Красный Октябрь һәм Ленинода эшли һәм мәрхәмәтлелек белән шәфкатьлелекнең яшь чикләрен белмәвен исбатлыйлар.

Таяныч һәм көч: урта яшьтәге волонтерлар

31 яшьтән 54 яшькә кадәрге 46 ирекле үзәкнең ышанычлы нигезен тәшкил итә. Бу төркемдә бигрәк тә ир-атлар, шул исәптән хәрби хәрәкәтләрдә катнашучылар күп. Нәкъ менә алар, үз җилкәләрендә хезмәт тәҗрибәсе булган хәлдә, СВОның беренче көннәреннән үк иң җаваплы бурычларның берсен – гуманитар йөкләр җыю, логистиканы һәм посылкаларны турыдан-туры махсус хәрби операция зонасына илтүне үз өстенә алалар.

Игелек хезмәтендә яшьлек энергиясе

Яшьләрнең социаль проектларга актив кушылуын күреп, йөрәк сөенә. 14 яшьтән алып 30 яшькә кадәрге 115 волонтер бүгенге көндә иң кыен хәлдәге кешеләрне үз канаты астына алды. Алар өлкән яшьтәге хезмәтчәннәргә һәм пенсионерларга дарулар һәм азык-төлек китереп, һәркемнең кайгыртуга һәм игътибарга лаек булуын искәртеп, шатлык һәм җиңеллек китерә.

Биләүдән башланган игелек

Шәфкатьлелек рухы безнең районда кечкенәдән үк сеңеп китә. Балалар бакчасыннан ук педагоглар балаларда мохтаҗларга ярдәм итү теләге тәрбиялиләр. Нәтиҗә дә күз алдында: волонтерлык хәрәкәтендә бүген 7 яшьтән алып 13 яшькә кадәрге 72 иң яшь, әмма гаҗәеп актив һәм ихлас ярдәмче бар.

Аерым юнәлеш: Ватанны саклаучылар гаиләләренә ярдәм итү

Мәрхәмәт үзәге эшенең иң мөһим өлеше – хәрбиләрнең гаиләләренә һәрьяклап ярдәм итү. Волонтерлар гуманитар ярдәм җыюны оештыралар, солдат хатыннары, әниләре һәм балалары өчен хәйрия чаралары һәм бәйрәмнәр үткәрәләр, аларга бәяләп бетергесез мораль ярдәм күрсәтәләр һәм үз геройларын көтүчеләргә тирән рәхмәтләрен белдерәләр.

Шундый ихлас энтузиазм һәм фидакарьлек нәтиҗәсендә иреклеләр сафы даими үсә. «Мәрхәмәтле Яңа Чишмә» волонтерларының илһамландыргыч үрнәге районның һәр кешесенә ориентир булсын, яхшылыкның чыннан да йөрәктә тууын һәм гадәти тормышта чын могҗизалар тудырырга сәләтле булуын искәртеп торсын. Аларның риясыз гамәлләре аерым кешеләрне генә бәхетлерәк итми, бәлки җәмгыятебезне ныграк, кешелеклерәк һәм татурак итеп берләштерә.