Мәхәббәт – бер-береңне сүзсез аңлау

Петропавел Бистәсе авылыннан Александр һәм Светлана Соловьевлар ныклы гаиләнең серен беләләр: мәхәббәт – бер-береңне аңлау ул. Уртак тормышның өч дистә елында, әлбәттә, аларның да үзара каршылыклары булгалый, ләкин бер-берсен ишетми һәм тоя алмый башлаган бер генә көн дә булмый.

Светлана балачактан ук хезмәт тәмен һәм иҗат шатлыгын белә. 11 яшеннән ул мәктәп каникулларында пешекче әнисенә совхоз ашханәсендә булыша, ә 15 яшенә әнисе аңа борщ пешерергә һәм хәтта хисап алып барырга ышанып тапшыра. Әмма аның төп мавыгуы һәрвакыт музыка була. Ул һәркайда җырлый – кухняда, мәктәптән кайтканда, авыл клубы сәхнәсендә. Мәдәнияттә эшләү турында хыяллана, әмма язмыш башкача хәл итә.

Александр мәктәптән соң машина йөртүчегә укыган, чик буе гаскәрләрендә хезмәт иткән һәм туган авылына кайткан. Ул вакытта яшьләр барысы да шәһәрләргә китә башлаган чак, ләкин ул кече ватаныннан башка тормышны күз алдына да китерә алмый. Кичләрен ямьләндерер өчен, егетләр күрше авыл клубларына йөриләр. Һәм бер кичтә ул Красный Октябрьдә шат күңелле, яңгыравык тавыш белән җырлаучы Светлананы очрата.

– Ул минем язмышым икәнен шундук аңладым, - дип искә ала Александр.

Ул Светага 18 яшь тулганчы ике ел түземлек белән көтә. 1993 елда алар туй ясыйлар.

Мәхәббәт хакына компромисслар

Яшь хатын клубта эшләргә хыяллана, ләкин ире аңардан башка һөнәр сайлавын сорый – үзешчән сәнгать кичләрен, ял көннәрен һәм бәйрәмнәрне алыр иде. Ул чакта колхозда шофер булган Александр хатынын өйдә ешрак күрергә тели.

— Мин үпкәләргә мөмкин идем, ләкин аны аңладым, - ди Светлана.

Ул пешекче булып урнаша, ләкин музыкадан аерылмый – концертларда җырлый, соңрак сәнгатькә мәхәббәтен кызлары Лена һәм Таняга тапшыра. Кызлар балачактан ук, гаилә иҗат традицияләрен дәвам итеп, конкурсларда чыгыш ясыйлар.

2016 елда гына, кызлар үсеп җиткәч кенә, әниләре үз хыялын тормышка ашыра: авыл мәдәният йорты мөдире булып эшли башлый. Алабуга мәдәният көллиятендә укып, мәдәният өлкәсендә һөнәри эшчәнлек алып бару хокукын бирә торган диплом ала.

Светлана Соловьева үз эшен иҗат коллективларын торгызудан башлый. Беренче булып «Сударушки» ансамбле оештырыла. 35 яшьтән узган хатын-кызлар клубка җыела, репертуар сайлый, борынгы җырларны, яшьлек җырларын искә төшерә, заманчаларын өйрәнә башлый. Репетицияләр кичләрен, эштән соң үткәрелә. Башта бик күпләр килә, ләкин әкренләп, кызганычка каршы, көнкүреш кемнәрнедер кире үзенә тарта. Җырлау сәнгатенә иң тугрылыклы алты хатын-кыз һәм Светлана үзе кала.

-Ә Петропавел клубына сәнгать җитәкчесе булып тәҗрибәле мәдәният хезмәткәре Аня Суворова эшкә килгәч, тагын бер «Подруги» ансамбле оештырылды, биредә катнашучылар бераз өлкәнрәк, - дип сөйли Светлана.

– Шулай ук «Улыбка» һәм «Кампанелла» балалар җыр коллективлары, «Звездочки» бию һәм «Овация» театраль коллективлары оештырылды. Авылның мәдәни тормышы кайнап тора башлады. Барлык коллективлар үз авылларында гына түгел, районның башка мәдәният йортларында да чыгыш ясыйлар, чакыру буенча аннан читкә дә чыгалар.

Светлана ансамбльдә дә соло башкара, ялгыз гына да җырлый. Ә күптән түгел аларны – Светлана Соловьева һәм Аня Суворованы районның иң яхшы тавышлары җыелган «Шешминские зори» төркеме составына кертәләр.

Канат куя торган мәхәббәт

Хәзер нефть компаниясендә эшләүче Александр шатланып хатынының концертларына йөри. Ул аның уңышлары белән горурлана һәм авыл тормышын яхшы якка үзгәртергә омтылышын хуплый.

— Иң мөһиме – бер-береңне аңлау һәм кабул итү, - диләр ир белән хатын.

Аларның тарихы – чын мәхәббәтнең көтә, кичерә, компромиссларга бара һәм илһамландыра белүе турында. Ә тагын – бәхет хисләргә генә түгел, үзара хөрмәт итүгә дә корыла.

Бүген, 50 яшен тутыручы Светлана үзенең язмышыннан бик канәгать булуын, никахта бәхетле булуын, һөнәрдә үзе табуын әйтә. Ире Александр белән бергә кызларының бәхетенә шатланалар: алар икесе дә яхшы егетләргә кияүдә.

Лена белән Константинның кызы София үсә, аңа 4 яшь һәм ул да җырлый. Таня белән Артурның бар да алда әле.

Соловьевлар гаиләсе – ул гармония үрнәге, анда ике ярты бер-берсен тулыландыра, ә мәхәббәт гомер барышында ныгый гына бара.