«Факел» балалар лагерен ачтылар

Яңа Чишмә җәйне матур вакыйга – «Факел» балаларны савыктыру лагереның беренче сменасын ачу тантанасы белән каршылады. Балалар җыйнак өйләргә моннан бер атна элек күчсәләр дә, иң дулкынландыргыч хәл нәкъ менә шушы көнне булды: бәйрәмгә әти-әниләре, әби-бабайлары һәм хөрмәтле кунаклар килде.

Яңа Чишмә районы башкарма комитеты җитәкчесе Егор Тарнавский балаларга сәламләү сүзе белән мөрәҗәгать итте:

- Бу җәй яңа дуслар, кызыклы вакыйгалар һәм нык сәламәтлек белән истә калсын! - дип теләде ул балаларга.

Лагерь җитәкчесе Ирина Банцырева балаларны бай программа көтә, дип сөйләде. Биш иҗади әйдаман һәм физрук әллә никадәр актив уеннар һәм мастер-класслар әзерләгән. Һәр көн спорт, иҗат һәм күңел ачу белән тулы булачак.

Барысына да төкәнмәс энергия бүләк иткән концерт

Бер атна әзерләнү дәверендә балалар лагерьга ияләшеп кенә калмаганнар, искиткеч концерт та куйдылар! Биюләр, җырлар, сценкалар – яшь артистлар тамашачыларны да үз ритмнарына җәлеп итте. Балаларының сәхнәдә нинди дәрт белән чыгыш ясавын күреп, ата-аналар елмаюларын яшермәделәр.

-Без инде дуслашып өлгергән идек, хәзер бары тик маҗаралар гына көтәбез! – дип, ял итүчеләр тәэсирләре белән уртаклаштылар.

«Факел» лагере балаларның шат көлүе, дуслык һәм җәйге могҗизалар өчен ишекләрен ачты. Алда – өч атна онытылмаслык хис-кичерешләр!

Яхшы яллар сезгә, балалар!