Сугышчылар һәм волонтерлар белән очрашу

Үзебезнекеләрне ташламыйбыз

Яңа Чишмәнең "Олимп" спорт залында ялда һәм дәвалануда булган хәрбиләр һәм волонтерлар район башлыгы Вячеслав Козлов белән очрашты.

Очрашу чәй өстәле артында җылы, иркен шартларда узды.

Район башлыгы сугышчыларыбызны җылы сәламләде һәм бүгенге көндә СВО зонасында 150дән артык яңачишмәленең булуын, хәзер 15 сугышчының ялда яки яралану сәбәпле дәвалануын һәм тернәкләнүен әйтеп үтте. Ул егетләргә батырлыклары өчен рәхмәт белдерде, районның гуманитар ярдәм күрсәтүе турында сөйләде.

"Безнең волонтерлар 90 мәртәбәдән артык егетләребезгә гуманитар йөк белән бардылар, СВО зонасына 95 млн. сумга якын кирәкле материаллар, азык-төлек, инструментлар, 60 автомобиль һәм мотоцикл илтелде. Без волонтерлар - Илгизәр һәм Эльмира Насыйбуллиннар, Александр Карпов, Виктор Калмыков, Азат Суниевка һәм битараф булмаган район халкына риясыз ярдәмнәре өчен бик рәхмәтле. Ә сезне, егетләр, өйгә исән - сау һәм җиңү белән көтәбез», - дип ассызыклады Вячеслав Козлов.

Ул шулай ук, кызганычка каршы, СВО зонасында һәлак булган якташларыбыз да бар, дип билгеләп үтте. Алар истәлегенә кече ватаннарында мемориаль такталар куела, ә район үзәгендә һәйкәл төзү планлаштырыла.

Егетләргә мөрәҗәгать итеп, район башлыгы килеп туган сораулар буенча район администрациясенә, шулай ук җитәкчеләре очрашуда катнашкан социаль хезмәтләргә мөрәҗәгать итәргә кирәклеген әйтте.

Хәрбиләр тарафыннан яралану буенча түләүләр, яраланганнан соң дәвалану буенча бирелгән сораулар район башлыгы тарафыннан шәхси контрольгә алынды. Ул шулай ук ир-егетләргә СВО зонасыннан кайткач эшкә урнашу мәсьәләләрен хәл итәргә вәгъдә итте.

«Ватанны саклаучы» фондының социаль координаторы Рузанна Храмова билгеләп үткәнчә, запаска чыгарылганнан соң адаптация мәсьәләләре, протезлар алу, хәрби хәрәкәтләр ветераны статусы буенча Фондның район филиалына мөрәҗәгать итәргә мөмкин.

Волонтер Илгизәр Насыйбуллин мөрәҗәгатьләр һәм сораулар өчен махсус чат барлыгын әйтте. «Егетләребезгә аеруча кирәк булган бөтен нәрсәне тиз арада алырга һәм тиз арада алгы сызыкка илтергә тырышабыз", - дип билгеләде ул.

Очрашу ахырында район башлыгы барлык сугышчыларга матди ярдәм йөзеннән конвертлар тапшырды.