Көрәшче Булат Мусин кабат дөнья чемпионы булган

2023 елда билбау көрәше буенча дөнья чемпионатының финал ярышлары безнең республикада узды. Ярышларда дөньяның 27 иленнән барлыгы 250дән артык спортчы катнашкан.

Көрәш «Саба-Арена» спорткомплексында һәм Байлар Сабасы поселогындагы «Сабантуй» спорт комплексында узган. Финал уеннары Саба районының Миңгәр авылында 24 июнь кичендә оештырылган.
Финалның хәлиткеч көрәшләре 11 авырлык категориясендә узган. Безнең якташыбыз Булат Мусин Үзбәкстан көрәшчесен җиңеп, 100 килограммга чаклы авырлык категориясендә җиңү яулаган. Һәм шуның белән ул 2022 елда Үзбәкстанда узган дөнья чемпионатында яулаган билбау көрәше буенча үзенең чемпион исемен раслаган.

Барлык җиңүчеләргә Кубоклар һәм акчалата бүләкләр тапшырылган.

Булатны дөнья чемпионы исеме белән котлыйбыз, аңа яңа җиңүләр һәм спорт өлкәсендә уңышлар телибез.