40 ел элек без ниләр турында яздык

«Яңа Чишмә хәбәрләре» 1984 ел, 5 июнь  

КПСС Өлкә Комитеты, Югары Совет Президиумы, ТАССР Министрлар Советы, Татоблсовпроф һәм ВЛКСМ өлкә комитетының барлык эшчеләргә бу корылыклы елда азык әзерләү буенча тиешле эшләрне башкарырга чакыру белән мөрәҗәгате басылып чыга.

Зирекле авылы халкы да районның барлык халкына шундый ук мөрәҗәгать белән чыкты.

Газетада беренче яртыеллыкта шәхси сектордан сөт һәм йон тапшырган өчен бүләкләү шартлары басылып чыга. 1 тоннадан артык сөт тапшыручыларга «ИЖ-Планета» мотоциклы, 750 - 1000 кг - электросепаратор һәм кер юу машиналары сатыла. 50 килограммнан артык йон тапшыручыларга бензопила, 30-50 килограмм - кер юу машиналары һәм электр насослары (аңлатып үтик, ул елларда әлеге электр приборлар, мотоцикллар яки җиңел автомобильләр дефицит иде, аларны кибетләрдә сатып алу мөмкин булмады. Азат Мусин искәрмәсе).

Бу санда район Сабантуеннан зур материал әзерләнде. Сабантуй әләмен күтәрү хөрмәте ХХ партсъезд исемендәге колхозның алдынгы савымчысы Антонина Мельниковага һәм шул ук хуҗалыктан яшь механизатор, «Урак -1983» герое Николай Филипповскийга бирелә. КПСС район комитетының беренче секретаре Алексей Казаковның сәламләү сүзләреннән соң производство алдынгылары: ХХ партсъезд исемендәге колхоздан Виктор Козлов, «Рассвет» колхозынан Анна Попова, «Черемуховский» совхозыннан Александр Данилов, «Татарстан» колхозыннан Рәфкать Насыйбуллин, «Буревестник» совхозыннан Мария Порецкая, «Маяк» колхозыннан Фоат Ибраһимов һәм башкалар бүләкләнә.
Уеннар, аттракционнар, конкурслар оештырыла. Узышларда 18 ат катнаша (беренчеләрдән булып Зирекледән «Сашко» атында Исхак Сафин килә), юртаклар узышында беренче урынны «Красный Октябрь» совхозыннан Евгений Белоглазов һәм Куйбышев исемендәге колхоздан Николай Никитин ала. «Райсельхозтехника»дан Рәшит Әхмәтвәлиев Сабантуй батыры булды.

«Яңа Чишмә хәбәрләре» 1984 ел, 7 июнь  

Бу санның алгы битендә азык әзерләүне көчәйтү буенча кичекмәстән чаралар турында хәбәр ителә. 5 июньнән азык әзерләү буенча удар айлык игълан ителә, барлык хуҗалыкларга сенаж, яфрак азык һәм төрле үләннәр әзерләү буенча йөкләмәләр җиткерелә.

Колхозларга һәм совхозларга су сибү җиһазларын тәүлек әйләнәсе куллануны оештыру, 1983 елгы уңышның барлык тупас һәм сусыл азык запасларын катгый исәпкә алуны һәм саклауны тәэмин итү йөкләнә. Айлык чорында республика шулай ук шәһәр эшчеләрен һәм хезмәткәрләрен шимбә һәм якшәмбе көннәрендә азык әзерләүне оештыру өчен районнарга җибәрәчәк.

«Закамский» совхозы механизаторлары Николай Гусляров һәм «Татарстан» колхозының Чаллы Башы бригадасы колхозчылары бәрәңге һәм тамыразыклар үстерү буенча коллектив подрядта звеноларның эше турында сөйлиләр.