40 ел элек без ниләр турында яздык

Безнең тарих

«Яңа Чишмә хәбәрләре» 1984 ел, 17 июль  

Урып-җыю эшләренә керешер алдыннан район колхозларында һәм совхозларында комбайннар парады уза. Алар «Татарстан», «Советская Татария» газетасы, Калинин исемендәге колхозларда узды. Комбайнчылар М. Алешин, В. Әбүнәгыймов, Ю. Алешин, И. Арбузов һәм башкалар инде кырга чыгарга әзер.

Ләкин бөтен җирдә дә урып-җыюга әзерләнмиләр. «Кичуй» колхозындагы хәлләр аеруча борчый, анда комбайннарның яртысыннан артыгы әзер түгел, кадрлар сайланмаган. «Красный Октябрь» совхозында да урып-җыю звеноларын тулыландырырга кирәк.

Техниканың уңыш җыюга әзерлеге буенча борчулы хәл районда үткән халык контроле комитеты утырышында каралды. «45 комбайнның берсе дә әзерлек линиясенә куелмаган, 2 ПГС - 45 арбалары ремонтланмаган, 22 комбайн бөтенләй ремонтланмаган. Ындыр табагы да бөтенләй әзер түгел, территория чүпләнгән, ашлык чистарту комплексы әзерләнмәгән. Колхозның яңа рәисе итеп сайланган Н. Ирзаһитовка кимчелекләр күрсәтелә, ә баш инженерга (элеккеге рәисенә) Ф. Шәйхетдиновка шелтә белдерелә», - дип яза халык контроленең район комитеты рәисе Максут Зыятдинов.

«Яңа Чишмә хәбәрләре» 1984 ел, 19 июль  

«Красный Октябрь» совхозының алдынгы сыер савучысы Фахирә Мортазина турында язма басылып чыга. Ул район Советы депутаты, коллективның иҗтимагый һәм җитештерү эшләрендә үрнәк булып тора. Ф.Мортазина шулай ук яшьләрнең остазы да әле, ул күп тапкырлар Бөтенсоюз социалистик ярышларда җиңүче. Көн саен һәр сыердан 15 килограмм сөт сава. Барлык продукция - югары сыйфатлы. Аңа III дәрәҗә Хезмәт Даны ордены тапшырылган.

«Яңа Чишмә хәбәрләре» 1984 ел, 21 июль

«Черемуховский» совхозында кирпеч заводының эшләмәве турында район Халык контроле комитеты хәбәр итә. «Әгәр 1980 елда завод 100 меңгә якын кирпеч чыгарса, 1983 елда 44 мең данә генә. Ә 1984 елда - тагы да азрак, нибары 8 мең данә. Ә бит заводның директоры да бар (А.А. Морозов), заводка экскаватор һәм йөк машинасы бүлеп бирелгән, әмма совхоз җитәкчелеге дә, завод директоры һәм прораб И. С. Сальцин да кирпеч җитештерүне арттыру буенча бернинди дә чаралар күрми. Совхоз үз ихтыяҗлары өчен кирпечне читтән сатып ала», - дип яза халык контроле рәисе Максут Зыятдинов.

«Маяк» колхозында борчак чабу эшләренең тәмамлануы турында язма басылып чыга, бу эшне комбайнчы Мансур Галләмов яхшы башкарган.

Фотода: «Красный Октябрь» ТҖХның алдынгы сыер савучысы Фахирә Мортазина.