40 ел элек без ниләр турында язган идек

Безнең тарих

  «Яңа Чишмә хәбәрләре» 1984 ел, 18 август  

КПСС райкомы һәм Советның башкарма комитеты июль аенда терлекчелек эшенә йомгак ясады. «Черемуховский» совхозы җиңүче дип танылды, аңа күчмә Кызыл Байрак тапшырылды. «Шешминский» совхозында эш канәгатьләнерлек түгел, аларга «Өмет» вымпелы бирелде. 

Сыер савучылар арасында иң яхшы күрсәткечләр ХХ партсъезд исемендәге  колхоздан Антонина Мельниковада. МЭТ симертү буенча шул ук колхоздан Зоя Попкова алдынгы булып тора, яшь МЭТ үстерүдә Куйбышев исемендәге колхоздан Александр Ерундовның күрсәткечләре яхшы. Дуңгызлар симертүдә беренче урын «Кичуй» колхозыннан Николай Ветошкинга бирелде.  

  «Яңа Чишмә хәбәрләре» 1984 ел, 21 август  

Районның Мактау тактасына урак алдынгылары ХХ партсъезд исемендәге колхоздан Анатолий Мятлев, Павел Дунаев, Николай Филипповский, «Татарстан» колхозыннан Миншакир Мөхәммәтҗанов, Равил Баһаветдинов, Тәбрис Сабиров, «Советская Татария» газетасы исемендәге колхоздан Хәбибулла Хәйруллин, Михаил Алешин, Виктор Филиппов һәм «Буревестник» совхозыннан Василий Темников исемнәре язылган.

КПСС райкомы пленумында оештыру мәсьәләсе каралды. КПСС райкомының беренче секретаре Анатолий Казаков үз вазыйфасыннан азат ителә һәм аның урынына элек Мөслим районы башкарма комитеты рәисе булып эшләгән Гариф Хафизов сайлана.

Пленум КПСС райкомы бюросы члены итеп Казанга башка эшкә күчкән район башкарма комитеты рәисе Евгений Чершенцев урынына Виталий Макаровны сайлады.

Пленум эшендә КПСС Өлкә Комитеты секретаре Минтимер Шәймиев катнашты.

«Яңа Чишмә хәбәрләре» 1984 ел, 23 август  

Акъяр авыл советы рәисе Н. Галимова колхоз ашханәсе пешекчесе Тәскирә Мисбахованың намуслы эшләве турында яза. «Аның махсус белеме бар, бик тәмле пешерә, ә ашханәдә һәрвакыт чиста һәм уңайлы», - диләр колхоз механизаторлары.

«Элеккечә сафта» - сугыш ветераны, «Красный Октябрь» совхозының алдынгы механизаторы Михаил Яковлевич Сухоруков турындагы материал әнә шулай дип исемләнгән. Аны игенчелек өлкәсендә - оста, вазыйфасы буенча - склад мөдире, һөнәре буенча - шофер һәм слесарь, тракторчы һәм комбайнер дип атыйлар. Урып-җыюда һәрвакыт алдынгылар сафында. Ул бөтен сугышны, шул исәптән Курск сугышын да узган, Днепрны кичкән, Будапешт һәм Берлинны азат иткән. II дәрәҗә Ватан сугышы ордены, «Батырлык өчен», «Берлинны алган өчен» медальләре белән бүләкләнә. Сугышчан бүләкләргә «Хезмәт батырлыгы өчен» дигән медаль дә өстәлгән.

Рәсемдә: «Красный Октябрь» совхозы комбайнчысы М.Я. Сухоруков.