40 ел элек без ниләр турында язган идек

  «Яңа Чишмә хәбәрләре» 1984 ел, 20 октябрь

КПСС райкомы бюросы һәм район Советы башкарма комитеты карары белән урып-җыюда һәм туңга сөрүдә җиңүчеләр билгеләнде.

«Буревестник» совхозыннан Василий Темников лидер булды, ул 4580 центнер ашлык суктырган. «Советская Татария» газетасы исемендәге колхоздан Михаил Алешин икенче урында - (4500 ц), өченче урында - «Татарстан» колхозыннан Равил Баһаветдинов (3630 центнер).

Коллектив подрядта «Советская Татария» газетасы исемендәге колхоздан Кыям Фәттахов җитәкчелегендәге бригада иң яхшысы булып танылды.

Машина йөртүчеләр арасында «Закамский» совхозыннан Александр Ермолаев җиңүче булды. Ул бер сезон эчендә 39900 тонна - километр юл узган. Икенче урында - ХХ партсъезд исемендәге колхоздан Василий Заворохин.

Тракторчылар арасында ХХ партсъезд исемендәге колхоздан Виктор Козлов җиңүче булды, икенче урында - «Татарстан» колхозыннан Фаик Кашапов.

Барлык җиңүчеләргә кыйммәтле бүләкләр һәм Мактау грамоталары тапшырылды, Василий Темниковка - «Жигули» автомашинасын чираттан тыш сатып алуга талон, ә Виктор Козловка һәм Александр Ермолаевка - чираттан тыш коляскалы мотоцикллар сатып алуга талоннар (әйтергә кирәк, ул елларда җиңел автомобильләр һәм мотоцикллар ирекле сатуда юк иде - Азат Мусин искәрмәсе).

  «Яңа Чишмә хәбәрләре» 1984 ел, 23 октябрь

«Бәхет табар өчен дошман белән көрәштем» - Әдәмсәдән сугыш һәм хезмәт ветераны Габдулла Вәлиев турындагы материал әнә шулай исемләнгән. Сугыш елларында артиллерист Мәскәүне, Сталинградны саклаган, Балтыйк буе илләрен фашистлардан азат иткән, Җиңүне Берлинда каршылаган. 2 һәм 3 дәрәҗә Дан орденнары белән бүләкләнгән. «Хатыны Миңниса белән 10 бала үстерәләр, хәзер оныкларына сөенеп гомер итәләр», - дип яза мәкалә авторы.

  «Яңа Чишмә хәбәрләре» 1984 ел, 25 октябрь

Районның партия оешмаларында отчет - сайлау җыелышлары бара. Алар ХХ партсъезд, «Советская Татария» газетасы, «Татарстан» исемендәге колхозларда һәм «Красный Октябрь» совхозында үтте.

1984 елның 9 ае нәтиҗәләре буенча иң яхшы сыер савучыларның исемнәре басылып чыкты. Алар арасында ХХ партсъезд исемендәге колхоздан һәр сыердан 3457 кг сөт савып алган А.С. Мельникова, Н.Н. Иголкина (3341 кг), З. М. Полякова (3060 кг), «Черемуховский» совхозыннан З.А. Ласточкина (2810 кг), А. М. Лазаревалар бар (2800 кг). 

Комсомолның туган көне алдыннан КПСС райкомы һәм район Советы башкарма комитетының котлавы басылып чыкты.

Рәсемдә: Ленино урта мәктәбе укучылары Лена Журавлева, Аня Емельянова һәм Светлана Митрюхина көзге кыр эшләре вакытында үзләренең «Советская Татария» газетасы исемендәге колхозга булышалар.