Профилактик рейдлар үткәрелә

Рейдлар барышында, нигездә, күп балалы гаиләләр, ялгыз яшәүче өлкән кешеләр, инвалидлар, шулай ук уңышсыз гаиләләр яшәгән йортларда булалар.
- Мондый рейдлар үткәрү даими була башлады, бигрәк тә быел, чөнки республикада янгыннар саны артты, үлүчеләр дә булды. Рейдларның максаты – янгыннарга, анда кешеләр, шул исәптә балалар үлеменә юл куймау. Йортларда булганда төп игътибарны электр җиһазларының, газ мичләренең төзеклегенә юнәлдерәбез, - дип сөйли МОНД һәм ПР сорау алучысы Андрей Шишлов.
Күп балалы гаиләләр һәм ветераннар яшәгән йортларга профилактик тикшерүләр үткәрү барышында элегрәк урнаштырылган автоном хәбәр бирүче җайланмаларның батареялары алыштырылган. МОНД инспекторлары шулай ук электр үткәргечләрнең торышын, хуҗалыкларда янгын куркынычсызлыгы кагыйдәләрен үтәүне дә тикшергән. Халык белән янгын куркынычсызлыгы буенча инструктаж үткәрелгән, шулай ук аларга “ашыгыч хезмәт” телефоннары язылган белешмәлекләр тапшырылган. “Мондый гаиләләр аерым игътибар зонасында тора, без алга таба да профилактик эшне үткәрәчәкбез”, - дип сөйли МОНД һәм ПР өлкән инспекторы Илнур Госсаметдинов.