Укучыларның кызу урак өсте

Кайбер имтиханнар соңгы кыңгырау көненнән алданрак башланды. 23 майда унберенче сыйныф укучылары әдәбият, география һәм химия тапшыру өчен Аксубайга - имтиханнар уздыру пунктына барганнар.

21 һәм 22 майда 5 тугызынчы сыйныф укучысы Чистайда инглиз телен, ә 23 майда Яңа Чишмә урта мәктәбе базасында 16 кеше туган (татар) теленнән имтихан тапшырган.
28 майда 11 сыйныфны тәмамлаучы 46 укучы рус теле буенча имтихан биргән, иртәгә, 31 майда, аларны математика буенча БДИ көтә (профильле һәм база), 4 июньдә 16 кеше физика һәм җәмгыять белеме буенча БДИ бирәчәк.

Тугызынчы сыйныф укучылары калган ТДИны Яңа Чишмә урта мәктәбе базасында тапшыралар. 27 майда биология (20 укучы), информатика (29), җәмгыять белеме (67), химия (5) буенча имтиханнар узган. Бу фәннәрне укучылар үзләре сайлаган. 

27 майда сайланган ике фән буенча ТДИның берсен тапшыра алмаган укучылар моны 30 майда эшләгән яки 10 һәм 14 июньдә тапшыра алачак.  Бүген, 30 майда, 129 укучы география, 6сы - физика һәм 11е - химияне тапшыра; 10 июньдә 24се информатика, 14 июньдә 12 укучы физика, биология һәм химия буенча ТДИны бирәчәк.  

Рус теле һәм математика буенча ТДИ 3 һәм 6 июньдә узачак, бу ике мәҗбүри фәнне 174 укучы тапшырачак. 

ТДИ һәм БДИ нәтиҗәләре аларны үткәргәннән соң ике атна узгач билгеле була. 

Укучыларның имтиханнарны уңышлы тапшыруларын телибез!