“Матурлык туган җирдә“

Вахит Баһаветдинов - күренекле рәссам. Аның картиналары Мәскәү күргәзмәләренә куела, ул Рәсәйнең иң сәләтле рәссамнары каталогында урын алган шәхес. Рәссамның иҗатында төп урынны пейзаж алып тора. Утыздан артык картинасында туган як табигате сурәтләнгән: "Салкын кич", "Бака күле", "Туган яклар", "Тиз яңгыр", "Күрше апаның йорты" һәм башкалар. Фойеда Вахит Баһаветдинов картиналарыннан күргәзмә оештырылды. Күргәзмәне картиналарны чигеп иҗат итүче тормыш иптәше Рифа ханымның кул эшләре дә тулыландырды.

Кичәне "Шушы җирдән, шушы туфрактан без" җыры белән Илназ Шәйхетдинов ачып җибәрде. Шахмай авыл җирлеге башлыгы Ринат Хәсәнов рәссамга җылы теләкләрен белдереп, истәлекле бүләк тапшырды. Зирекле музее директоры Мидхәт ага Газыймов, Шахмай авылы ветераннар советы рәисе Әсхат ага Шәрипов китаплар бүләк иттеләр, рәссамның туган як табигатен чагылдырган картиналарын югары бәяләделәр.