Бер атна эчендә коронавирус инфекциясен дүрт яңачишмәле йоктырган

- Көн саен РҮХкә ОРВИ яки хастаханәдән тыш пневмония белән авыраучы 15-16 кеше мөрәҗәгать итә, - дип билгеләп үтте РҮХнең баш табибы вазыйфаларын башкаручы Наталья Роменская. – Бүгенгесе көндә 13 кеше стационарда, 2 кеше Чистайның COVID госпиталендә дәвалана.

Коронавируска каршы вакцинация дәвам итә. Районга барлыгы 10950 доза вакцина кайткан, прививканы 10239 кеше ясаткан. Хәзер ел башында прививка ясаткан кешеләрнең яңадан прививка ясату (ревакцинация) вакыты җитә. Алар барысы да хастаханәгә яки җирле ФАПларга мөрәҗәгать итә алалар. Районда вакцина бар. Шулай ук ФАП фельдшерларының заявкалары буенча торак пунктларда вакцинация үткәрү дә дәвам итә.

17 ноябрьгә прививканы районда яшәүче 60 яшьтән өлкәнрәк кешеләрнең 71%ы (2276 кеше) ясаткан. Әмма Чаллы Башы һәм Әдәмсә авылларында, Петропавел, Архангел һәм Черемухово Бистәләрендә 60 яшьтән өлкәнрәк булган прививка ясатучылар саны район дәрәҗәсеннән шактый түбән.

Район халкына мөрәҗәгать итәбез – прививка ясатыгыз, үзегезне һәм якыннарыгызны саклагыз! Бу мәкерле чир беркемне дә аямый, безнең районда, кызганычка каршы, бу инфекциядән үлем очраклары да бар.