Донор булу - күркәм гамәл!

Донор каны катлаулы операцияләрдә яки бала тапкан вакытта, байтак кан акканда, авыр җәрәхәтләр, пешүләр һәм башка авырулар белән интегүчеләр өчен кулланыла. Бер донорның каны аерым компонентларга бүленә һәм  берничә пациентның гомерен саклап калырга ярдәм итә.

18 яшьтән өлкәнрәк, 55 килограммнан артык авырлыктагы теләсә кайсы сәламәт кеше донор була ала. 500 мл күләмендә кан бирү кеше сәламәтлеге өчен зарарсыз һәм куркынычсыз санала.

 Донорга кан бирү өчен ничек әзерләнергә?

3 тәүлек алдан анальгин, аспирин һәм башка антикоагулянт-дарулар эчмәскә.

2 тәүлек алдан алкоголь кулланмаска.

Кан бирергә 1 тәүлек калганда майлы, ысланган, ачы ризыклар ашамаска.

Кан биргән көндә иртәнге ашны ашау мөһим (шикәрле чәй, суда әзерләнгән ботка, сохари, варенье белән бутерброд).

2 сәгать алдан тәмәке тартмаска.

Канны ничаклы еш биреп була?

Ир-атлар елына 5 тапкырдан, хатын-кызлар елына 4 тапкырдан да арттырмыйча кан бирә ала. Кан биргәннән соң, кабаттан кан бирер алдыннан ким дигәндә 60 көн, ә плазма бирер алдыннан ким дигәндә 30 көн үтәргә тиеш.

Донорга кан биргәннән соң ничек үз хәленә кайтырга?

Кан биргәннән соң донорга күбрәк сыеклык (ким дигәндә 2 литр) эчәргә тырышырга кирәк, бу: чәй, сок, минераль су булырга мөмкин, шул ук вакытта алкогольдән тыелу зарур.
Аксымга бай ризыклар ашагыз, мәсәлән, ит, бавыр, балык ите, йомырка, кузаклылар, карабодай, киптерелгән җиләк-җимешләр.

Донорлар нинди өстенлекләргә ия?

Кан тапшыру көнендә донор эштән азат ителә (хезмәт хакы саклана). Донорга ел дәвамында тагын бер ял көне бирелә.

Донор туклану өчен акчалата компенсация ала.

40 тапкыр кан яки 60 кат плазма биргәннән соң донорга «Россиянең Мактаулы доноры» исеме бирелә.