Наталья Роменская: «Балалар ата-ана битарафлыгының корбаны булырга мөмкин»

Район хакимиятендә узган «эшлекле сишәмбе» киңәшмәсендә Яңа Чишмә РҮХнең баш табибы вазыйфаларын башкаручы Наталья Роменская районда балаларга вакцинация үткәрү торышы турында сөйләде.

 2022 елның 1 июленә план буенча прививкалар алучы балаларның саны түбәндәгечә: 6-12 яшьтәгеләр - 50 (96%), 2 яшькә кадәргеләр - 116 (98%), 3 яшьлекләр - 106 (98%), 6 яшьлекләр - 141 (98%), 13 яшьлекләр - 161 (99%), 14 яшьлекләр - 177 бала (98%).

 2022 елда ТР Сәламәтлек саклау министрлыгының коронавирус инфекциясенә каршы көрәшү планы нигезендә, Гам-Ковид-М вакцинасы белән 12 яшьтән алып 17 яшькә кадәрге балаларга вакцинация үткәрелгән. Прививка барлыгы 180 яшүсмергә ясалган - бу вакциналаштырылырга тиешле балаларның 100%ы, алар ковидтан беренче һәм икенче прививканы алганнар.

Әмма вакцинациянең әһәмиятлелегенә карамастан, үз балаларына кайбер прививкаларны яки тулысынча прививка ясатудан баш тарткан ата-аналар да бар. 1 июльгә шул сәбәпле 37 балага вакцинация үткәрелмәгән - барлыгы 162 прививка. Беренче урында район үзәге - 21 бала, Зирекле авылында - 7, Акбүредә - 3, Чаллы Башында һәм  Красный Октябрьдә - 2шәр, Тубылгы Тауда һәм Черемухово Бистәсендә - 1әр бала. Вакцинация узмаган 37 баланың 20се - балалар бакчасына йөри, 17се - йөрми.

Кызганычка каршы, профилактик прививкалардан баш тарту мәгариф учреждениеләренә йөрүне тыюга сәбәп була алмый.

 Туберкулиндиагностика туберкулезны профилактикалауда иң мөһим чараларның берсе.

Санитар-эпидемиологик кагыйдәләр нигезендә, ата-аналарның баш тартуы аркасында туберкулиндиагностиканы үтмәгән балаларга балалар учреждениеләрендә булу тыела. Балага коллективта булу табиб-фтизиатрның уңай бәяләмәсе булганда гына рөхсәт ителә.

1 июльгә ата-аналары туберкулиндиагностикадан баш тарткан 15 бала күзәтү астында: шуларның 5се - балалар бакчасында, калганнары юк. Балалар коллективында булучы балаларның бишесендә дә табиб-фтизиатр бәяләмәсе бар, алар авырмый.

 «Медицина хезмәткәрләре вакцинациядән баш тарткан гаиләләрдә зур эш алып баралар. Без ата-аналарга моның нәрсәгә китерә алуын төгәл итеп аңлатырга тырышабыз. Әмма, кызганычка каршы, ата - аналарны вакцинацияләүнең нәтиҗәлелеген раслаучы статистика да, ата - ана битарафлыгының корбаны булган балаларның фаҗигале язмышы да ышандырмый», - дип ассызыклады Наталья Роменская.