Татарстанда ковидка каршы прививка ясату өчен дәүләт хезмәте порталы аша язылып була

Татарстанда коронавирустан вакцинациягә Россиянең дәүләт хезмәтләре порталы аша язылу мөмкинлеге бар.

Прививка ясатырга язылу өчен дәүләт порталындагы «Табибка язылу» яки аерым «COVID-19 коронавирусыннан вакцинация» хезмәтләреннән файдаланырга тәкъдим ителә. Төгәл дата һәм вакытны билгеләп булмаган очракта, вакцинация узарга теләүчеләр исемлегенә язылырга кирәк.

Медицина оешмаларында вакцинациягә чиратлар ике атна алдан төзелә. Шуңа күрә прививка ясатырга язылганда, медицина хезмәткәре элемтәгә кереп, вакцинациянең көнен һәм вакытын хәбәр итсен өчен, шәхси мәгълүматларны да язып калдыру мөһим.

Прививка ясаткач, кеше үзенең сәламәтлеген күзәтеп, Россиянең дәүләт хезмәтләре порталындагы махсус көндәлеккә теркәп бара ала. Прививканың икенчесен ясатканнан соң вакцинация узу турында электрон сертификат җибәрелә.

Бүген Татарстан халкы вакцинация узарга бик актив языла башлады, аларны прививка ясатырга теләүчеләр исемлегенә теркәп баралар.