Әхмәтовлар гаиләсе: анда спорт, җыр һәм мәхәббәт хөкем сөрә

Аларның йорты энергия, үзара аңлашу һәм чын гаилә гармониясе белән тулы. Гөлсия үзен бик бәхетле хатын дип атый, һәм әлбәттә, моның өчен сәбәп тә бар.

Спорт – гаилә традициясе

Әхмәтовларны юкка гына «спорт гаиләсе» дип атамыйлар. Гөлсия мәктәптән үк чаңгы, йөгерү һәм волейбол белән мавыга. Мингали яшьтән үк волейбол уйный, көрәшә һәм йөгерә. Спортка мәхәббәт балаларына да күчә.

Уллары Илназ белән Ильяс авыл Сабантуйларында милли көрәштә даими катнашалар. Моннан тыш, Илназ волейбол турнирларында район данын яклый. Мингали кызларын да спортка тарткан: олысы Гөлназны тимераякта шуарга өйрәткән, быел кечесе Гөлшатны да бозга чыгарганнар. Күптән түгел Мингали уллары һәм авыл активистлары белән Әдәмсәдә шугалак ясаганнар, хәзер анда гаиләдәге барлык ир-егетләр хоккей уйный.

Әни мирасы – җыр һәм буяулар

Әгәр әтиләре спорт өчен җаваплы булса, әниләре – иҗат өчен. Гөлсиянең  әтисеннән калган зур сәләте – җырлау. Аны «энҗе тавышлы» дип атыйлар. Элек ул клуб каршындагы «Ләйсән» ансамблендә чыгыш ясаган, ә хәзер теләсә нинди авыл бәйрәмендә кызы белән дуэтын яки ялгыз чыгышын ишетергә була. Өйдә ул туганнары өчен тулы бер концерт оештыра. Мәсәлән, армиядән өлкән улы кайтканда. Әниең үзе профессионал булганда, бернинди артистларны да чакырырга кирәкми. Гөлсия, балаларын да ата-бабадан калган мирас белән таныштырып, бары тик татар җырларын гына башкара.

«Ирем дә өйдә еш кына миңа кушылып җырлый. Кайчак машинада барганда, флешка куеп, татар җырчыларына кушылып җырлыйбыз», - дип елмаеп уртаклаша Гөлсия.

Олы кызы Гөлназ әнисенең геннарын үзләштереп, җырлап кына калмый, рәсем дә ясый, бии дә. Ул инде «Яңа Чишмә гүзәле» бәйгесендә «Беренче принцесса» булган һәм «Нәүрүз гүзәле» бәйгесендә җиңгән. Кыз сәхнәдән курыкмый: конферансье булып  чыгыш ясый, шигырьләр укый. Ә Гөлсия, балалар бакчасында тәрбияче ярдәмчесе булып эшләгәндә, бәйрәмнәрдә дә бакчаны бизәүдә тулы бер сәнгать композицияләре тудыра. Кече кызы да, әнисенә һәм сеңлесенә карап, буяуларга тартыла.

Нык тыл: хезмәт һәм үзара ярдәмләшү

Әхмәтовлар гаиләсе – мавыгулардан гына тормый, әлбәттә. Аларның зур шәхси ярдәмче хуҗалыгы бар: сигез сыер, бозаулар, тавыклар. Көн тәртибе җайга салынган: иртәнге саву – ата-аналар өстендә, кичке савым белән уллары шөгыльләнә. Гаиләнең үз техникасы – комбайны һәм тракторы бар, алар ярдәмендә азык әзерлиләр. Бу бурычны гаиләнең көчле яртысы үз өстенә алган. Кызлар әниләренә өйдә булышалар, һәм бергә зур җир кишәрлегендә эшлиләр.

Олы уллары инде һөнәр алган һәм эшлиләр: Илназ – Түбән Камадагы «ТАИФ» заводында, Алмаз – «Ямашнефть» идарәсендә. Олысы, шәһәрдә яшәсә дә, әти-әнисенә ярдәм итәргә дип еш кайтып йөри. Өченче уллары Ильяс 9 нчы сыйныфны тәмамлый. Балалар барысы да тыйнак, яхшы укыйлар, эшләп һәм өлкәннәргә хөрмәт белән үсәләр.

Ныклы гаилә сере

Мартта Гөлсия белән Мингалинең гаилә коруына 22 ел була. Гаҗәп, әмма бу еллар эчендә алар бер тапкыр да ачуланышмаганнар. Аларның никахы, яшь аермасы зур булуга карамастан (кыз 18 яшьтә кияүгә чыга, егеткә 38 яшь була), гаять нык һәм бәхетле булып чыга. Икесе дә күп балалы гаиләләрдә үскәннәр һәм үзләренең зур, тату йортлары турында хыялланганнар. Һәр баланың дөньяга килүен көтеп алганнар.

- Кыз көттек, ләкин һәрбер улыбызга шат булдык. Гөлназ тугач, бер кыз янына икенчесе дә булырга тиеш дип хәл иттек, - дип елмая Гөлсия.

Вак бәлеш исе аңкып торган йорт

Әхмәтовлар гаилә бәйрәмнәрен өйләрендә билгеләп үтәләр. Аларның кунакчыл йортына Тубылгытаудан Гөлсиянең әти-әнисе, гаиләләре белән бертуганнары килә. Өстәл гадәттәгечә вак бәлеш һәм башка милли ризыклардан сыгылып тора. Гөлсия барысын да үзе әзерли.

Ана фәлсәфәсе

Тәрбиядә Гөлсиянең төп принцибы – игелек һәм зирәклек.

«Әни, барыннан да элек, игелекле, кайгыртучан, зирәк булырга тиеш. Мин балаларга һәрчак ярдәм итәм. Катлаулы ситуацияләрдә беркайчан да кычкырырга кирәкми, утырып сөйләшү яхшырак. Кычкырып бернәрсәгә дә ирешеп булмый. Объектив булырга тырышырга кирәк. Бәлки, бала нәрсәдә дә булса хаклыдыр, син үзең хаклы түгелдер»,-дип ышана ул.

Барысына да ничек өлгерергә? Җавап гади

Гаилә тормышы – гаилә кыйммәтләре, эш, хуҗалык һәм шәхси мавыгуларны ничек гармонияле итеп яраштыруның искиткеч үрнәге ул.

Мондый зур һәм мәшгуль гаиләдә «Ничек барысына да өлгерәсез?» дип сорагач, Гөлсия гади һәм зирәк җавап бирә:

«Үз хезмәтеңне яратканда, шөгылеңне яратканда, бөтенесенә дә – җырларга да, чыгыш ясарга да, рәсем ясарга да, хуҗалык алып барырга да өлгерергә була. Мин балаларымны да шуңа өйрәтәм: үзләре эшләгән эшне яратсыннар һәм һәрвакыт әти-әниләренә ярдәм итсеннәр».

Әхмәтовлар гаиләсенең бәхет сере нәкъ менә эшкә, балаларга, тормышка булган киң колачлы мәхәббәттә инде. Гөлсия: «Мин бик бәхетле әни һәм хатын. Гаиләдә балалар күп булу бәхет ул», - ди. Аларның тату, эш сөючән, талантлы гаиләсенә карап, моңа берсүзсез ышанасың.