Татарстан Республикасы буенча Социаль фонд бүлеге укытучыларга иминият пенсиясен пенсия яшенә җиткәч түгел, ә махсус стаж туплаганнан соң билгели.
Пенсиягә китү шартлары
Моның өчен мәгариф учреждениеләрендә педагогик вазыйфаларда ким дигәндә 25 ел стаж һәм 30 пенсия коэффициенты тупларга кирәк.
Педагоглар өчен иминият пенсиясен билгеләүнең махсус тәртибе гамәлдә. Төп шарт булып һөнәри эшчәнлекнең дәвамлылыгы тора, әмма кирәкле махсус стаж һәм пенсия билгеләү арасында биш еллык чор каралган.
Шулай итеп, 2026 елга кирәкле стаж эшләп туплаган педагог 2031 елда пенсия алу хокукын гамәлгә ашыра алачак. Бу чорда педагог булып эшләү яки хезмәт эшчәнлеген дәвам итү мәҗбүри түгел: кайда һәм кем булып эшләү пенсия билгеләү хокукына түгел, бары булачак пенсия күләменә генә тәэсир итә.
Гарантияләр бар
Шул ук вакытта кирәкле 25 ел педагогик стаж туплаганнан соң, хезмәткәр «пенсия алды» статусын ала. Бу аңа элеге категория гражданнары өчен каралган гарантияләрдән файдалану хокукын бирә.
Махсус стажны исәпләгәндә, балалар белән турыдан-туры эшләү еллары гына исәпкә алынмый. Кайбер очракларда аңа педагогның һөнәри белем алуга яки квалификациясен күтәрүгә багышлаган чорлары да кертелә. Мондый чорларны исәпкә алу өчен хезмәткәрнең вазыйфасы һәм уртача табышы сакланырга, ә уку вакытында иминият кертемнәре түләнергә тиеш.
Нет комментариев