Татарстанда яшәүче 45 яшькә җиткән ир-атлар һәм 40 яше тулган хатын-кызлар формалашкан пенсия хокуклары турында хәбәрнамә алалар.
Татарстан Республикасы буенча Социаль фонд бүлеге аларны өч елга бер мәртәбә «Дәүләт хезмәте» порталы аша проактив форматта җибәрә.
Мондый хәбәрнамәләр булачак иминият пенсиясен формалаштырганда нинди мәгълүматлар исәпкә алынуын алдан ук күрергә мөмкинлек бирә. Документта иминият стажының дәвамлылыгы һәм тупланган индивидуаль пенсия коэффициентлары саны чагылыш таба. Шунда ук пенсиянең агымдагы елда гамәлдә булган пенсия коэффициенты бәясеннән һәм теркәлгән түләү күләменнән чыгып исәпләнгән беренчел күләме күрсәтелә. Пенсия тупланмалары булган очракта, хәбәрнамәгә шулай ук алар турында мәгълүмат та кертелә.
Мәгълүматларны булачак пенсияне бәяләү өчен генә түгел, шәхси исәп-хисапны тикшерү өчен дә кулланырга мөмкин. Әгәр дә кеше хәбәрнамәдә аерым эш чорлары яки башка мәгълүматларның исәпкә алынмавын яки дөрес күрсәтелмәвен ачыкласа, мәгълүматны алдан ук төзәтергә мөмкин.
«Проактив форматта мәгълүмат алу кешегә үзенең пенсия хокукларын формалаштыруны алдан ук контрольдә тоту мөмкинлеген бирә. Стажны һәм пенсия коэффициентларын тикшерү өчен пенсия билгеләү вакыты җиткәнне көтәргә кирәкми. Мәгълүматларда төгәлсезлекләр бар икән, аларны вакытында төзәтергә мөмкин», - дип билгеләп үтте Татарстан Республикасы буенча Социаль фонд бүлеге идарәчесе Эдуард Вафин.
Шәхси счетка төзәтмәләр кертү буенча гаризаны Дәүләт хезмәтләре порталы аша җибәрергә, Татарстан Республикасы буенча Социаль фонд бүлегенең яисә күпфункцияле үзәкнең клиент хезмәтендә шәхсән тапшырырга мөмкин. Аерым чорларны раслау өчен хезмәт эшчәнлеге турында документлар, мәсәлән, хезмәт кенәгәсе яки хезмәт килешүе кирәк булырга мөмкин.
Нет комментариев