«Мин йөз баллга исәп тотмаган идем»

Рус теленнән БДИда 100 балл — меңләгән укучы хыялланган, әмма бик сирәкләр генә ирешкән нәтиҗә. Быел бәхетлеләр исемлегенә Яңа Чишмә урта мәктәбен тәмамлаган Мария Урядникова керде.

Без Маша белән аның моңа ничек ирешкәнен ачыклау өчен очраштык.

- Маша, нәтиҗәне күргәч, үз күзләреңә тиз генә ышанмавың дөресме?

- Чынлап та, мин моны компьютер хатасы яки сайтта нидер йөкләнеп бетмәгән дип уйладым. Мондый хәлнең булуы мөмкин түгел иде! Мин 80 яки 90 балл көттем, ләкин һич кенә дә йөзне түгел. Бу бөтенләй көтелмәгән хәл булды.

- Имтиханга бик озак әзерләндеңме?

- Әйе, 10 нчы сыйныфта ук әзерләнә башладым, ягъни ике ел буе. Ләкин фанатизмсыз гына. Минем дедлайннар белән катгый системам юк иде. Төп әзерлек укытучыбыз Любовь Ивановна Реброва белән мәктәптә булды. Мин ул биргән җыентыклар буенча шөгыльләндем, һәм сочинение буенча өстәмә онлайн-курслар алдым. Моны җитәрлек дип саный идем.

- Өйдә мөстәкыйль әзерлек тә булгандыр бит?

- Теләгем булганда, утыра идем. Көчем юклыгын сизсәм, бер атна да берни эшләмәскә мөмкин идем. Беркайчан да үземне мәҗбүр итмәдем.

- Мөгаен, беренче имтихан куркыткандыр?

- Мин дулкынланырмын дип уйлаган идем, чөнки рус теле иң беренче сынау иде. Тик үз-үземә ышана идем. Ә үз вариантымны күргәч, нык шатландым. Миңа шактый җиңел варинат эләкте, ә инша «Ни өчен кешеләр туган телгә сак карарга тиеш» темасына иде — бу бик гади һәм аңлаешлы тема. Бәлки, миңа бәхет елмайгандыр, мөгаен, әзерлек тә үз ролен уйнагандыр.

- Киләсе елда БДИ тапшыручыларга син нәрсә киңәш итәр идең?

- Иң мөһиме – хезмәт белән ялны бергә куша белү. Һич кенә дә төнлә утырырга ярамый! Мәктәптән кайткач, мин еш кына башта йокларга ята идем, аннары, башым ял иткәч кенә дәреслекләргә тотына идем. Үз-үзеңә ышаныч һәм тыныч булу – менә уңышның сере.

- Мөгаллимәгезгә дә рәхмәтлесеңдер?

- Әлбәттә! Любовь Ивановна безне 1 нче сыйныфтан укытты. Нәкъ менә ул безгә рус теленә мәхәббәт орлыклары салды. Миңа аның дәресләрендә шөгыльләнү рәхәт иде, әзерлек зур рәхәтлек китерде. Мин аңа моның өчен бик рәхмәтле. 100 балл – аның укытучы буларак җиңүе дә ул.

- Хәзер кая керергә уйлыйсың?

- Мин гуманитар юнәлешне сайладым, инглиз телен һәм җәмгыять белемен тапшырдым. Хәзер реклама һәм җәмәгатьчелек белән элемтә буенча белгечлекләрне карыйм. Рус телендәге йөз балл миңа бу эштә ярдәм итәр дип өметләнәм.

Машаның әнисе Любовь Борисовна да кызы белән горурлануы хакында җиткерде:

- Маша – молодец! Ул бик тырышты, бу – аның җиңүе. Без аның белән чиксез горурланабыз. Бу белемнәр аңа тормышта кирәк булырга насыйп итсен.

Әңгәмәдәш - Ольга Иванова.

Подписывайтесь на наш Telegram-канал "Шешминская новь"